الوصايا العشر للطحان التونسي

أي نعم النهضة ربحت ، أي نعم النهضوين قاموا بالثورة ، أي نعم الإسلام هو الحل ، أي نعم النهضة فهمتني وفهمت الجميع و أنا زادة فهمتها و نحب نوجه رسالة للطحانة العهد القديم و الجديد و نقلهم ما تخافوش أنتم لها

شعارنا : النهضة إختياري ولن أعدل عن قراري.    

الوصايا الإلهية العشر:

-الصلوات الخمس في وقتها في الجامع كلهم بش الناس الكل تشوفك..

-صلوات قيام الليل (سمع الجيران بلغدة) و ركعات سنة و النوافل ما فيها باس في البركون 

-اللحية لا يقل طولها على 50 سنتمتر ( يا حبذا مشبشبة كي ساق الغولة ) 

- قفطان أبيض و ما يوصلش للكعبين بش  كلاستك تكون ضاهرة مليح وريحتها تفوح مليح زادة 

-السبحة دائماً في يدك و قول إلي يجي مش مشكلة 

-حط التلفزة على قناة الرحمة و إقرأ و الناس بأقوى بصوت عالي وخليهم و أخرج نورمال يدهم

-رش نفسك بلعطرشية حتى تكون رائحتك فائحة على بعد 10 أمتار 

-قراءة كتب عذاب القبر ، مفتاح الجنة ، نهيق الحمير و دلالته و حفظها عن ضهر قلب 

-بعد حفظك للكتب اعدها على مسامع كل من تتحدث معه بصوت عالٍ (ما تنساش إلي يزيد يشدد على طرق التعذيب أكثر هو مسلم أكثر) 

- إذا رأيت عورة متبرجة متعدية سبها و انعتها بالفسق (تنجم تكمل تكحل على ترمتها عليها بعد ما تتعدى ) 

مع الطحين الوطني الحر غمض عينيك حلها تلقى روحك في السعودية  

و الله ولي التوفيق. 

الهيأة العليا لمأوى العجز:تقف غادي

مرحبا بيا في البلوغ من جديد ، عندي برشة ملي تقطعت علي شاهية الكتيبة من كثر ما تفلڨت و ما طيرهالي مراهقي البسكو أمية و الماسونية و عالمي الغيب..، الحاصل جماعة "نحن الحق وأنتم الباطل" و" هيا نرجعوا لربي، هيا نرجعوا لنهضة" و اللغة متع جبورة الفايسبوك ما بعد الثورة.
 المهم بول عليهم جرذ..جرذ..ما جيتش بش نحكي عليهم اليوم. 

برى يا قهوة و اجا يا قهوة و أنا في القهوة جاني صاحبي رمزي (الله يسامحوا و يغفرلو) حكالي حكاية مزيانة، أكسزيون بضبط، فهمتها كيفاه ؟ قلي هيا نمشو نقيدو مع جماعة أعضاء مكتب الإقتراع و أهوكة نراقبو نحن بعيننا الإنتخابات في عوض منا قاعدين نبرو عليهم و نتفرجو من بعيد و نعملوا حاجة تصلح..المهم اقنعني و مشيت نجري نهار الخميس هبط مالخدمة 17h  للقصبة قبل ما يسكروا بش نقيد إسمي. 

قيدت و قالولي تو نكلموك..روحت فرحاً مسروراً مورالي في العلالي نستبندة في الحومة ( الطيب جعبة ). 

وبمأني مازلت جديد في الخدمة و منجمش نهز التليفون (مازلت البهيم القصير)  قعدت نلوج على واحد ثقة في الحومة نعطيه التليفون يهز عليهم ويعرف موعد الفرماسيون و اذاكا إلي صار. عملت فرمسيون مع زملائي (أكثر من شطرهم مكهبين على الستين) و قالولي كي العادة تو نكلموك...   

نهار التلاثة بعثولي ميساج SMS بش نحضر الإجتماع الأخير للهيئة الفرعية تونس 1 قبل الانتخابات، فصعت ملخدمة و  مشيت حضرت إجتماع رئيس الهيئة فيه ما يعرش يغني النشيد الوطني ( نشيد يبدا بالمقلوب  سعدو مكبوب و أبو القاسم الشابي يندب فهم في قبروا )...المفيد أكدلنة في الإجتماع أنا بش نستلموا الصناديق نهار الجمعة أو السبت مع 13h، بش نثبتو من كل شيء و نحضروا مكتب الإنتخاب و بالطبيعة كي العادة " تو نكلموك".. 

برى يا تليفون و اجا يا تليفون و مازلت نستنى في التليفون يحن و يتعطف علينا و تكلمنا هالهيئة... شي لا حياة لمن تنادي.  

طلعت أنا و رمزي للقصبة بش نثبتو اليوم قالولنا نحن مشينا بالأعمار، إلي أكبر أولى ، أقل حاجة 22 سنة!!!!!!! ولهنا كما قال البج نحب نقول:" تقف غادي" علاه اسمها الهيئة الفرعية المستقلة للإنتخابات و إلا هيئة مأوى العجز للإنتخابات ؟؟ الثورة قام بها الشياب وإلا الشباب؟؟مع كامل إحتراماتي لناس المناضلين من قبل ما نجي أنا و إلا غيري..المهم على لحسبة هذي بش نلقو 80% ملمكاتب اعضاءها فوق الأربعين و الباقي حنو عليهم و شدو أعضاء مكلفين بالصف.

 نعم انها ثورة الشباب!! 

شكراً للبوعزيزي ( العمر : 93 سنة ) ، شكراً لشهداء تونس (أصغر واحد فيهم : 50 سنة) ، شكراً لإلي ضربوا الحاكم و حرقوا المراكز و بالخصوص الشاب عم المولدي المكلف بصنع المولوتوف (العمر: 70 سنة ) ، شكراً لنساء تونس الأحرار و خاصةً الشهيدة منوبية ( العمر: 101 سنة) وبالطبع إلي للقعدوا ساكتين أجيال وأجيال و صحا ضميرهم في أخر لحظة وليد ( 20 سنة ) و فؤاد ( 23 سنة ) و رمزي ( 24 سنة ) و كريم ( 19 سنة ). 

أنا فهمت و انتي وقيت بش تفهم. 

أنا تونسي حر و لست ثورجياً 16/07/2011

                           "Victoire de Tunisie", Avenue Habib Bourguiba.19 février 2011. Photographie Hamideddine Bouali    



مانيش مع إعتصام "العصافير" و أعارض بشدة إعتصام القصبة 3 و نرى فيه حسابات و مخططات حزبية إسلامية و مش في وقتها. و مانيش من دعاة البطولة و مسمي نفسي ثوري لأن نرى أنو من واجب كل تونسي إنو يخرج لإسقاط نظام بن علي أيام 14 جانفي و قبلها ، الثورة ملك الشعب و ليس حزب أو شخص أياً كان (السبسي أو غيره ). 

لكن إلي وقع مبارح في ساحة القصبة من إعتداء على المتظاهرين و إنتهاك لحرمة المسجد مش مقبول و ما عندوش مبرر و يحب يقول أن بن علي مازال موجود في شاكلته الأمنية القمعية . 

أنا اليوم خرجت بش نعبر على رئي كمواطن تونسي حر ( و ليس ثورجي) عن رفضه لمثل هذه الممارسات إلي تحمل رسالة العودة إلى عهد الدكتاتورية. مشيت لساحة محمد علي بش نقول "لا لعنف" و بهذه المناسبة نحب نقول وينهم الناس إلي خرجت في مظاهرة "لا لعنف و التعصب" بعد حادثة الأفريكار؟! و إلا الأمر يتعلق كان بل"خوانجية" و الباقي هوايش يتضربوا ميسالش ؟ للتذكير الكلنا توانسة أنا اليوم انتي غدوة. 

بدات المظاهرة بعدد لعشرات أمام ساحة محمد علي و نظراً لإغلاق قوى الأمن الشارع تحاشيناهم و دورنا من جهة الحفصية، الحلفاوين ، باب سويقة و كل ما مشينا العدد زاد كبير معاه ، إلى حد الأن المظاهرة سلمية و ما فما شي حتى وصلنا أمام مستشفى الأطفال بباب سعدون ، هاجمتنا باڨات البوليسية و حاصرتنا أما المستشفى عند مدخل السيارات و عطونا طريحة كلبة و شادو تقريباً المتضاهرين الكل (200 شخص أو أكثر) ، أنا منعت بأعجوبة و شوية بهامة من طرف الحاكم ، و فما باڨا سيبوها. 

الحاصل مهزلة و مؤشر خايب برشة ما يزدني كان تشائم و إحتقار لبعض الأطراف إلي تساند الأمن في شكله القمعي (جماعة اخطا راسي و اضرب ) و توا ولات (اخطا جماعتي و اضرب) ، نسينا إلي كلنا التوانسة ايد وحدة و ولينا نخمو بمصالحنا و خصةً "حكاية جماعتنا" الجديدة

 أنا تونسي مانيش متنازل عن حريتي و كرامتي.. 

إعتصام العودة : تحدي المتأسلمين الجدد

أنا نحب نستغل الفرصة هاذي متع إعتصام العودة نهار الجمعة 15 بش ندعو الخوانجية إلي نهار كامل يفرفتو و إلي يعبي فيهم راشد الغنوشي في الستادات  و يعيطو "تكبيييييير" و إلي دخلوا في البلاد غولة  وقسموها مسلمين وكفار و إلي بش يفوزوا في الإنتخابات فوز ساحق كما يحكيو و إلي قناة الجزيرة نهار كامل تبندرلهم.

يا أدمين قناة التنبير و صفحة كووورة تونسية و الحقائق الخفية و تفريكة وطنية على وزارة الداخلية و كل الصفحات إلي شراتهة النهضة و يعرفوا رواحهم و إلي يسبحوا ليل ونهار بحمد النهضة و الغنوشي!! و حاطين انفسهم أوصياء على الإسلام....يتفضلوا ويشمروا على ذراعتهم ويوريونا رواحهم نهار الجمعة..ميسالش أهبطوا نهار الجمعة و يزيكم ما قعدتوا في الستادات تتشمسوا و يزيكم ما خلصوا عليكم الماء والضو و شرولكم برفا جاردوور ...

 اهبطوا للشارع خنشوفوكم ، الصفحات النهضوية الكل تحرض ، وريونة قداش بش تخلطوا من واحد ، وريونا وزنكم الحقيقي و إلي بش تفوزو بيه . 

هذا تحدي للنهضة و المتأسلمين إلي ماخذنهة لموضة  هنهارين، ماكم قمتوا بالثورة؟! خنشوفو..

يوم الجمعة : يوم عودة الجرذان إلى جحورها

علاش عملنا ثورة؟

علاش عملنا ثورة؟

عملنا الثورة بش تولي تونس لائكية؟ 

لا 

عملنا الثورة بش تولي تونس خلافة؟ 

لا 

عملنا الثورة بش نبدلو الهوية العربية الإسلامية ؟ 

لا 

عملنا الثورة بش تطلع الأحزاب تحكي بإسمنا ؟ 

لا 

عملنا الثورة بش نمنعوا التطبيع مع اسرئيل ؟ 

لا 

عملنا الثورة بش يجي طارق المكي من كندا؟ 

أكيد لا 

ملة علاش عملنا الثورة ؟ 

عملنا الثورة بش البوليس يحترمني في الشارع و ما يطلعنيش في الباقا يضربني ؟ 

أي 

عملنا الثورة بش نضمنوا حرمتنا الجسدية؟ 

أي 

عملنا الثورة بش نوليو احرار؟ 

أي 

عملنا الثورة بش نخدمو و ما نقعدوش بطالة ؟ 

أي 

عملنا الثورة بش يتشدو السراق و يتحطوا في الحبس و نضمنوا حقنا ؟ 

أي 

عملنا الثورة بش نقضيو على الظلم؟ 

أي 

ملة وينو هذا الكل ما فماش؟ 

كل يوم نحلوا التلفزة بش نسمعو خبر يفرح و ما نسمعو كان الكارثة وأختها؟ و مازلنا نحلوا التلفزة و الفيسبوك على أمل... 

خوانجية و ماسونية و صهيونية و لائكية و احزاب زادت و احزاب نقصت و الشامبيونا من دون حضور جمهور و بركجات و ناس تقتل في بعضها و ما بين كل نصبة و نصبة و ورى كل نصبة تلقى نصبة و برشة فوضى و.....و..إلخ 

سيبنا قرايتنا و خدمنا و هبطنا لشارع بش ناكلو طرايح ، نتضربوا ، نتهانو ، نموتوا مش بش تطلع كمشة نخبة مزمرة تحكي على مشاغلها الأبستيسوسيوزومارجية..!!أما بش نوليو مواطنين حقيقيين لنا حقوق و واجبات. 

عملنا الثورة بش نوليو عباد. 

تصرحات الراجحي: الإلتفاف على الثورة.

تقول في "serie prison break" فرحات الراجحي يطرشق في حوار سري و لأول مرة نشاهدو مثلو في تونس، الحوار كان مصور بالسرقة من طرف صحافي أنزله في صفحة " سكندالي" على صفحة الفيسبوك، الفيديو يروي أحداث مؤامرة تحاك من وراء الشعب التونسي لالتفاف على الثورة و تجبد إسم خطير" كمال لطيف" و إلي قاعد هو اليوم متحكم في المشهد السياسي التونسي حسب ما قاله سي فرحات الراجحي.

تصريحات فرحات الراجحي كانت واضحة وصريحة، أهم ما جاء فيها:

-تسمية  رشيد عمار رئيسا لأركان الجيش هو تحضير لإنقلاب عسكري في صورة ما وصلت قوى غير مرغوبة فيها إلى السلطة مثل "حزب النهضة" أي التحضير لسيناريو جزائر في التسعينات أما المرة هذي في تونس في 2011.

-كمال لطيف وهو الذي أوصل بن علي إلى السلطة و كان نوعاً ما الرئيس في الخفاء حتى إختلف مع بن علي و إنقسم عليه، كمال لطيف هو صاحب جريدة"tunisnews" و صديق عديد المعارضين الذي ساندهم بعد أن إنشق على بن علي و هو من يمسك بالسلطة حالياً حسب فرحات الراجحي.

-الباجي القايد السبسي و اقالته لفرحات الراجحي لأنه رفض مقابلة كمال اللطيف ( ما حبش يكون عسكر كرذونة يعني!).

-التحذير من أن قوى التجمع عائدة لكن في ثوب جديد.

-الشيء الإيجابي الوحفد إلي قال هو أن ليس هناك رجوع لوراء في ما يخص حرية التعبير و الفضل عائد للانترنات.

الشيء إلي نفهموه من كلام السيد وزير الداخلية الاسبق انو الثورة إلي قام بها الشعب وقع الإلتفاف عليها من طرف نفس الشخص الذي ساعد بن علي في إنقلاب 7 نوفمبر 1987 و هو الذي يمسك بزمام السلطة في الخفاء حاليا بتواطؤ من رئيس الجمهورية و السبسي و رشيد عمار...

لزمنا نخرجو من ترهات التفرقة الحزبية  و الايديولجية، [صحيح أني معارض للنهضة لكن هذا لا يعني إنو يتم الإستيلاء على السلطة في صورة ما ربحت في الإنتخابات]، لزمنا الكل توا نكون يد وحدة في مواجهة قوى الردة إلي يقود فيها الباجي قايد السبسي و كمال لطيف و ازلام التجمع. 

مع العلم انو أي إعتداء على فرحات الراجحي أو الصحافي إلي قام بالتصوير هو استهانة بثورة الشعب التونسي وغياب حقيقي لمعنى الثورة التونسية.

إذا حبينا على الحرية يا ناخذها الكل يا مش لازم.  

شكون بش يحميني غدوة

  شكون بش يحميني غدوة؟ هاو نحينا بن علي ، حلينا التجمع و مبعد؟ كي يجي نظام بعدو ويعفس علينا كما بن علي ما عمل ؟ و كي تجي الحركات الإسلامية  تكركرنة لتالي وتعملنا خميني تونسي ؟ و كي يشدها الحزب الشيوعي و ترصيلنا في ستالين تونسي؟ و كي نرجعوا لدكتاتورية مرة اخرى(مع العلم إلي مازلنا م خرجناش منها)؟ شكون بش يضمنلي حقي أنا ؟ لشكون بش نشكي كي يشدني بوليس و يهرسني بطريحة ؟ هاو بن علي سرق وعذب و عيشنا في رعب و شكون حكى معاه؟ أختاه قالوا  ديمقراطية و كلمة حرة و حكايات فارغة،صدقت انتي؟ بالحرام المعبوكة ما ترجع هي بدها و هاي مرشومة.

مرشومة و مطبوعة و نبصم عليها بالعشرة كان نقعد ندكز هكى ما نرجعوا بالتوالي للعهد البايات.

     أي بابا، أي بابا! زد سمعنا و اتحفنا بحنكتك و قدراتك السياسية الخارقة ( خذ العلم من روس الفكارن)، ما حكولكش على حاجة اسمها منظمات المجتمع المدني؟! أي،سكر فمك..منظمات المجتمع المدني. في كل الدول الديمقراطية الضامن الفعلي لحريات الأفراد هي الجمعيات و المنظمات الحقوقية  ONG إلي يستمدو منها التقارير حول وضعية الحريات و حقوق الإنسان في أي دولة.

    في تونس تبركالله عنا 8000 جمعية 7900 منها متع كورة(دليل على تطورنا السياسي بفضل السياسة الرشيدة و الحكيمة والمنوبية و الرهدانة..) و 50 مندسة و 50 مسكرة( قسمة وخيان)
بن علي يرحم والديه( معكوسة تصبح ينعندن والديه) سكر علينا اللعب هذا بش ما ندرعلش خواطرو و حطنا جراد على رأس الإتحاد (وإلي اغتيل فرحات حشاد على خاطروا بعلم من بورقيبة حسب ما نعرف)، المهم  إلي النظام الدكتاتوري لقى الإتحاد وحدو فعفس على جد بوه الكلب و ما لقاش جمعيات كبار تضم كامل شرائح المجتمع بش تعفس عليه هي زادة.

   الجمعيات تمس كل مجالات المجتمع المدني الإقتصادية والسياسية و التعليمية... و تساهم في نشر وعي جديد و تغيير لون الصورة القزوردية عن العالم.

    في الوقت إلي يتعمل المجلس التأسيسي و المرحلة إلي بش يشدها و في إطار عدم الثقة المتبادلة بين الشعب و الأحزاب والسلطة لازم الجامعيين و النخبة التونسية  و الأفراد المستقلة تقوم بإنشاء جمعيات و المجتمع المدني يشارك فيها و تفرض وجودها كما أي جمعية(أكيد مش بسمة) وتأخد مع الوقت شرعيتها بالطبيعة مع الحفاظ على استقلاليتها و وقتها نظمنوا عدم الرجوع إلى الوراء و ما ندخلوش في نقاشات تافهة من نوع  "ميثاق العقد المدني" إلي من المفروض أن يكون شيء بديهي و ما يجيش حزب ما يوافقش عليه ( والله شيء يضحك).

        بش ما يكونش فما طريق إلى الوراء و وصاية سياسية كما الحاصل توا في هيئة حماية الثورة لازم فكر و وعي( ما نقعدوش نتخبطو كما توا ما نعرفوش شمعنها دولة لائكية وإسلامية وحقوق مدنية ) والإتفاق على مباديء إنسانية موحدة.

© جميع حقوق التنبير محفوظة 

شكون بش يحميني غدوة

    شكون بش يحميني غدوة؟ هاو نحينا بن علي ، حلينا التجمع و مبعد؟ كي يجي نظام بعدو ويعفس علينا كما بن علي ما عمل ؟ و كي تجي الحركات الإسلامية  تكركرنة لتالي وتعملنا خميني تونسي ؟ و كي يشدها الحزب الشيوعي و ترصيلنا في ستالين تونسي؟ و كي نرجعوا لدكتاتورية مرة اخرى(مع العلم إلي مازلنا م خرجناش منها)؟ شكون بش يضمنلي حقي أنا ؟ لشكون بش نشكي كي يشدني بوليس و يهرسني بطريحة ؟ هاو بن علي سرق وعذب و عيشنا في رعب و شكون حكى معاه؟ أختاه قالوا  ديمقراطية و كلمة حرة و حكايات فارغة،صدقت انتي؟ بالحرام المعبوكة ما ترجع هي بدها و هاي مرشومة.

مرشومة و مطبوعة و نبصم عليها بالعشرة كان نقعد ندكز هكى ما نرجعوا بالتوالي للعهد البايات.

     أي بابا، أي بابا! زد سمعنا و اتحفنا بحنكتك و قدراتك السياسية الخارقة ( خذ العلم من روس الفكارن)، ما حكولكش على حاجة اسمها منظمات المجتمع المدني؟! أي،سكر فمك..منظمات المجتمع المدني. في كل الدول الديمقراطية الضامن الفعلي لحريات الأفراد هي الجمعيات و المنظمات الحقوقية  ONG إلي يستمدو منها التقارير حول وضعية الحريات و حقوق الإنسان في أي دولة.

    في تونس تبركالله عنا 8000 جمعية 7900 منها متع كورة(دليل على تطورنا السياسي بفضل السياسة الرشيدة و الحكيمة والمنوبية و الرهدانة..) و 50 مندسة و 50 مسكرة( قسمة وخيان)
بن علي يرحم والديه( معكوسة تصبح ينعندن والديه) سكر علينا اللعب هذا بش ما ندرعلش خواطرو و حطنا جراد على رأس الإتحاد (وإلي اغتيل فرحات حشاد على خاطروا بعلم من بورقيبة حسب ما نعرف)، المهم  إلي النظام الدكتاتوري لقى الإتحاد وحدو فعفس على جد بوه الكلب و ما لقاش جمعيات كبار تضم كامل شرائح المجتمع بش تعفس عليه هي زادة.

   الجمعيات تمس كل مجالات المجتمع المدني الإقتصادية والسياسية و التعليمية... و تساهم في نشر وعي جديد و تغيير لون الصورة القزوردية عن العالم.

    في الوقت إلي يتعمل المجلس التأسيسي و المرحلة إلي بش يشدها و في إطار عدم الثقة المتبادلة بين الشعب و الأحزاب والسلطة لازم الجامعيين و النخبة التونسية  و الأفراد المستقلة تقوم بإنشاء جمعيات و المجتمع المدني يشارك فيها و تفرض وجودها كما أي جمعية(أكيد مش بسمة) وتأخد مع الوقت شرعيتها بالطبيعة مع الحفاظ على استقلاليتها و وقتها نظمنوا عدم الرجوع إلى الوراء و ما ندخلوش في نقاشات تافهة من نوع  "ميثاق العقد المدني" إلي من المفروض أن يكون شيء بديهي و ما يجيش حزب ما يوافقش عليه ( والله شيء يضحك).

        بش ما يكونش فما طريق إلى الوراء و وصاية سياسية كما الحاصل توا في هيئة حماية الثورة لازم فكر و وعي( ما نقعدوش نتخبطو كما توا ما نعرفوش شمعنها دولة لائكية وإسلامية وحقوق مدنية ) والإتفاق على مباديء إنسانية موحدة.

© جميع حقوق التنبير محفوظة 

الدينقراطيون: من أنتم؟

فين ما تدور و تجول هو موضوع واحد مهبل التوانسة الكل: تصور الإسلاميين يشدو الحكم؟!! في كل معهد و إلا كلية وفي كل زنقة و كل ثنية تلق الموضوع مطروح. 

من هم الإسلاميون (الدينقراطيون) إلي نحكو عليهم: كمشة فروخ تفرجوا في حلقتين للشيخ رهدان و قرى كتيب ال35 المبشرين بالجنة في 2011...يقوم يطول لحيتو كما قال الشيخ بهتان و يلبس ملحفة إلي وصى بها الشيخ كعرارو يقوم في الناس خطيباً و نذيراً كما ذكر الشيخ خرفان و أخيراً مرحباً بك في عداد المسلمين  المبشرين بالجنة و الساهرين على إقامة شرع الله و سلطانه..إلخ إلخ.

الإسلاميين هاذم كما "تدينوا" على طريقة شيخنا الرهدانية يدخلوا عالم السياسية من نفس الباب أيضاً...فما شكون يسترجل و يجيب من الأخير و يمشي بحذا سيادو (حزب التحرير) و فما شكون يبدا يتدروش و يمشي للنهضة  بدعوى أنها تخدم نفس الغاية بإسم أخر( تتمسكن لين تتمكن).

المهم في هذا الكل إلي لزمنا نعرفو شكون الأغلبية الساحقة المنخرطة في الحركات الإسلامية إلي ترتدي الديمقراطية للوصول للحكم و علاه ولينا نشوفو صلاة الجمعة في شارع الحبيب بورقيبة مش في الجامع و مطالبة بحرية إرتداء النقاب في المعاهد و غدوة تولي صوت  المرأة عورة و بلاش منو تمشي خير وغيروا ( شو اكة الثنية إلي ماشيين فيها!!).

الخطاب السياسي حاجة و الواقع الإجتماعي حاجة أخرى...مع الأسف ما فماش ديمقراطية مع عباد تدعي صفة القداسة و تتحدث بإسم الله كما الأغلبية إلي تحكي حالياً بإسم الإسلام في تونس و كأنها هي الإسلام!!!   

كفانا مغالطات، كفانا مهترات، كفانا تدغدغاً لمشاعر المسلمين...بن علي هرب، بن علي هرب...و انتوما حب تركبو على الديمقراطية بسيف و تردها دكتاتورية بإسم lلدين.

ملخص اللقاء الصحفي مع القايد السبسي

التونسي:أهلا سي السبسي..لباس؟ شتحب تقول في البداية؟

السبسي: مرحبا بيك..الصدق في القول و الإخلاص في العمل

التونسي: يا سي سبسي علاش طردت سي راجحي؟

السبسي: اموري..وأنتي دبر فيا شمدخلك؟.

التونسي: ما معنى هيبة الدولة ؟

السبسي: يعني أخلاق سياسية ( و عفط لنا على المباشر)..والفاهم يفهم

التونسي: باهي وينهم القناصة و البوليس السياسي والي قتلوا الشهداء ما حاسبهمش؟

السبسي:.........................تبع الغرزة

التونسي: باهي فين ماشي الإقتصاد اليوم؟

السبسي: ماشي و يتحسن...شبيك تسأل برشة ملة مكرز!!!!

التونسي: سامحني سي سبسي طولت عليك؟

السبسي:لا ميسالش أنا نبات معاك لصباح ما نجوبش...طولت على روحك(قتلك ما تجيش من الأول راني بش ننفخهملك).

التونسي : أية نتلقاو في القصبة على بلادتك..و زيد أنفخهملي مليح!!!!

اليد في اليد نبنيو تونس جديدة

برشة "ديغاج" ،عرك و معروك،نقاشات تكفيرية ،تكسير راس و لغة مضروبة بين احزاب و مكونات المجتمع المدني و الساسة...

بعيد عن جو المكهرب إلي تعيشو تونس اليوم إختار تلامذة معهد نهج روسيا التضامن الفعلي و المادي إلي  ينجم يقدم حاجة للبلاد بإرسال قافلة مساندة لمعهد من المعاهد المتضررة خلال الثورة يعاونوا بها زملائهم في معهد الثانوي بتالة....

الإختيار وقع بعد الاتصال بوزارة التربية إلي أعلمتهم أنو مبيت المعهد بتالة وقع حرقه و بعد ما نسقوا مع الادارة و الأساتذة بجمع التبرعات..المبادرة كانت من التلامذة في إطار عمل إنساني...إسم القافلة هو "حملة مساندة قافلة معهد نهج روسيا نحو أحد المعاهد المتضررة" إلي بش تنطلق يوم الأحد 20/02/2011.

كما نظموا حفلة غنائية بحضور بنديرمان قبلها بيوم لمزيد جمع التبرعات و إحياء جو يشجع على المشاركة و المساهمة في هالعمل الانساني.

كنت نتمنى إنا نبعدو عن جو الإضرابات إلي تستغل الفرص و تركب على الثورة و نقدمو حاجة برسمي تنفع البلاد و متزدش إدخلهة في حيط...أخطونا مشعرات الكذابة و اللغة الخشبية و المذرحة و هتولنة الصندي....

تعيش الثورات و تتعلم من ثورة تونس و تعيش الانسانية و تتعلم من إنسانية التوانسة و يعيش الساسة يتعلموا من تلامذة تونس.

حبوب الهلوسة الأفغانية و الاسلام

في إطار حملة التطهير الوطنية من البهامة و التطرف المستشري على اثر تعاطي بعض الشباب لحبوب هلوسة افغانية هنهايرين نتوجه لمراهقين بسيكوم و النهضة و الفكر الخوانجي الجديد بإقامة جمعية لمحق الامية الدينية و السياسية....

برشة صفحات جهل و تخلف نشأت بعد تعاطي حبوب الهلوسة هذي كما صفحة "من أجل إلغاء مجلة الأحوال الشخصية" و قرصنة صفحات من أجل الائكية  "تونس ليك..تونس ليا..تونس لائكية" مثلاً...و كثرة تعليقات التكفير الأفغاني و اخرها تكفير "محمد الطالبي(مفكر و مؤرخ مسلم تونسي معاصر) و غيرها من مظاهرالعنف اللفظي و المادي مثل ما صار البارح في سوسة...

برشة كانوا راقدين و غامين ريوسهوم تحت الفراشية و توا قامو و ولو حماة الثورة و الهوية الاسلامية..لذا نوصيهم بش يرجعوا يقراو تعليم إبتدائي عن قيم التسامح و الاحترام و الديمقراطية و الحرية الفردية و الجماعية..خاطر مواقف و أراء من دون أخلاقية وتسامح ما تنجمش تكون و إلا تولي عودة لدكتاتورية و تعصب و عنف مش مقبول..مش مبرر...

أول درس لدعاة الخلافة و مستهلكي حبوب الهلوسة هو الاسلام حرية ("لا إكراه في الدين،قد تبين الرشد من الغي" البقرة؛256)..ليس لأي انسان أن يستغل الاسلام في السياسية و استعمالها درعاً للوصول إلى الحكم و تحليل ما يحب و تحريم ما يكره..زيد القرأن لا يعلم تأويله إلا الله و علاقتنا مع الله مباشرة   من خلال القرأن و لسنا في حاجة إلى وسيط...كل انسان حر في اعتقاداته و أفكاره و سلوكه ما دام لم يلتجئ للعنف...

بعد ما نفهمو الدرس الأول بعد 10 سنين تخمام و ممارسة و تفكير اجاو تو نقراو الدرس الثاني عن مفاهيم الديمقراطية و اللائكية و....

كان معكم المربي الأفغاني الفاضل الشيخ مليشي من إذاعة باكستان...

غاز..كرتوش..توانسة ما نخفوش

أدولف هتلر قالي في يوم من الأيام و أنا احتسي معه كأس تاي في البركون "إن أردت السيطرة على الناس أخبرهم أنهم معرضون للخطر و حذرهم من أن أمنهم تحت التهديد، ثم شكك في وطنية معارضيك" صدق عرفي المفدى..أما نسى بش يقول الله لا تربحوا أن الشعب التونسي ما يمشيش معاه التعقريب هذا..

أنا مليشي محنك خدمت موسيليني و هتلر و بن علي و...ونحب نستعرف اليوم بجهلي و صدق المثل إلي قال"يموت المعلم و هو يتعلم" ، نفذنا مع التوانسة كل الكماكص الارهابية الممكنة..و باقي شي..كل يوم نزيد نتعقد..و اخرها إستأجر مجموعة من الزبراطة و الحثالة و على  رأسهم البوليس السياسي بالتعاون مع أصحاب النفوذ و الدوسيات المسخة بش نرعبوا المواطنين و نخوفوهم بش يسكرو إفاااامهم و نجمو ننقذو الكمشة فساد المزال في البلاد و نرجعوا نستعدو قوتنا...أما باقي مازلوا مهبلني..قادرين بحركة بسيطة كما تنظيف شارع الحبيب بورقيبة يطلعوا المورال و يسترجع قوتهم..و توا زاد عملولهم مجلس تأسيسي..الله الله!!! كل يوم طالعين بشعار جديد و لا يخافوا من غاز و لا كرطوش..ألهم!!!!!

بالله بش تكمل تفشل مهمتي شدو عبد الظلام جراد، حلو البوليس السياسي و التجمع..و كمل حاسبوا المسؤولين عن الفساد اليوم قبل غدوة خاطر بش يقعدو يدرعولكم في خواطركم و ما تنسوش تنظفوا وزارة الداخلية بالماء و الصابون و الدينول و...و برا ربي معاكم تو نخلهلكم واسعة و عريضه.

ملة شعب مصعصع...!!!!!

رسالة مفتوحة للغنوشي..

يا الغنوشي  تقرقش...تقلع..تزعزع..طييير ملة مراجة..بفففف.

يا الغنوشي أختاك مالشعب التونسي راهو قوي عليك..اسألني أنا مليشي محترف و نعرفهم بالغدة و حاولت نلعب معاهم ياخي عملوني نكتة "يا قناصة يا بصاصة"..

يا الغنوشي شكونهم النعاج إلي بعثهم يهيجو العباد و يكسروا و يحرقو!!! ياخي ما تربيتش من فازة الكراهب لوكسيون؟؟؟ نسيت درس بن علي و شعملو فيه؟؟ راهم شعب متربي على فن الحيل السياسية والامنية في عهد التغيير..ياخي نسيت سيدك كيفاه فضحوه و طردوه و ولى مخلوع؟؟ زايد حكام أخر زمان ما يتربوش...

تكتيك الاستفزاز بالغاز و تهييج المتظاهرين بالميليشيات الفاشلة و الغبية متاعك ياسر بهيم...تستخيلهم بش يسيبوك و تقعد شدهالهم ذلة و تخوف فيهم و تنسيهم مطالبهم فراك تحلم..راكم متربين عند نفس المدب و الفرق إلي هما حافظين دروسهم و انتي باقي شي..ملة تلميذ فاشل.

يا الغنوشي يا قديم..اخطاك من هلجيل و استقيل و أخرج بقدرك خير. وفك علينا من مندس و مش مندس و أنا نظيف ودينول وصابون.. راك بفضوح و ضاهر فيك جديد في الدومان..

حسيلوا مانجم نقلك كان يا غنوشي يا حقير كانك راجل استقيل.. 

صور إعتصام القصبة...

صور إعتصام القصبة اليوم  23/02/2011 في إنتظار جمعة الغضب...

كل يوم في القصبة..ونرمال

تونسي و ما عمبالي...عام أبيض،أزرق،أخضر...المهم لا رجعة لنظام المدب بن علي إلي تولدت و تربيت فيه...يا تنفذوا مطالبنا يا نموتوا ناس الكل...تونسي حربي وما عاد عمبالي حتى و كان قتلتوني... وهو انا خير من ولاد بلادي إلي ماتوا قدامي!!!!!!!! و كل يوم في الإعتصام حتى يسقط نظام الكاكوية هذا و نعملوا مجلس تأسيسي و جمهورية برلمانية فيها ممثل عن كل جهة و ما فهاش حقرة..و كلنا توانسة و نورمال.

لا تقلونا ا فتنة ولا فوضى  ولا جبنالك ليلى ،و خاصةً هنا فهمناكم و بدينا نخدموا يا حكومة البطالة...وأنا مليشي ونعرف وين مصلحتي...

رويق هاو بش نجبوا الزين و ليلى و عنا قص قتلوا قطوس..وقعدنا نلوجوا على كود خزنة مفيهاش كود شهر ولقينا فيها خمسلاف...يزينا منو (كان صاحبك عسل ما تلحسوش الكل) و زيد معناش وقت لتفوريخ توا..

يا غنوشي إفهم روحك و اقلب منظرك..مصغر مخك و أنا كل يوم نحشم في بلاصتك كي نسمع ألاف يعيطولك dégage. 

وما غير ما تعملوا على نظام عسكري" يضمن الانتقال ديمولكراسي.." و تقعدوا تكسرولي في راسي رنا واضحين في مطالبنا و لا فائدة (لا نظام رئاسي ولا دستور قزوردي ولا إعلام بودورو..).

 نحبو تونس جديدة لتوانسة الكل تلمنا مهما اختلفنا في ارائنا و توجهاتنا وتصرفاتنا و أي حكاية تخترلي في راسي....

حريتي لا تساوي خبزة..حريتي تساوي دمي.

التجمع الدستوري الاخواني ...أسف لن تنجح

 التجمع الدستوري يعود في ثوب جديد: من قفافة..إلى قناصة...إلى خوانجية"بالعينوا"..إلى مناضلين شرفاء.

بالله يا ناس بديت نهبل  خاطر التجمع اليوم عمل بعمايلوا في شارع الحبيب بورقيبة قدام عينيا... و هذي أول مرة إينشوف فيها:

1-اسلامين بالعينوا...يعيطوا "لا إله إلا الله" و هما يصطادوا في مسيرة اللإكيين و يكفروا فيهم.

2-نفس الاسلامين نحاو لغة الله و الرسول و ولى شباب مناضل يدافع عن الثورة و يمنع تضاهرة غنائية و يقول أنها إلتفاف على الثورة.

3-جماعة تقلب الفستا في  دقيقة  و ملي كانت إسلامية تستقطب في العباد بلغة الله و الرسول تولي جماعة مناضلة تستقطب في الناس على أساس حماية الثورة.

.......................

المهم إنو التجمع بش ينشر الفتنة في تونس و قاعد يبدل في الصبغة ملي كان قزوردي ولى وين ما تداورو يدور..و خاصة إلي وزارة الداخلية سحبت ملف حل التجمع. لذى يزي ما صبرنا على الحكومة الجديدة و إلي توا قدامت وصددت و هما للتوى لا حكاو لا على مجلس تأسيسي و لا نظام برلماني و   كمل يرفضوا لجنة الدفاع عن الثورة برشة على حمى.. ملة نرجعوا كلمة و صوت واحد ندافعو على مطالبنا بغض النظر على إسلامي و إلا لائكي و إلا حتى مجوسي...

حكاية لائكي و إسلامي نحكيو فيها مبعد ما نضمنوا حريتنا و ديمقراطيتنا و مطالبنا...خاطر تواجهاتنا و افكارنا ما يلزمهاش تنسينا إلي نحنا توانسة خوات و عدونا واحد زادة (التجمع و بقايا نظام بن علي).

و مازال يا تجمع ...مازال. 

"إركب في ترينو الثورة بوبلاش.."

كثرت في المدة الأخيرة الإضرابات العشوائية  متع طلاب سيدي محرز(ناس كل تعيط أمان زدني 500 مية فرانك في الشهرية ورسمني توا توا ...)  كيفها كيف الانتصاب الفوضوي إلي إحتل شوارع تونس و والعاصمة ولات تقول سوق سيدي عبدسلام  كل شي بدينار.

مطالب شرعية قامت كلها فرد ضربة  أما مش وقتها و كلها استغلالية تستغل في وضع الحكومة تحت الضرسة قاعد منعرش عن وعي و إلا لا تهز في البلاد للهاوية و إلي هي إلتفاف على مطالب الثورة و ملهيتنة عليها (مجلس تأسيسي ،نظام برلماني،إنتخابات حرة..) . 

أول ناس ركبت في ترينو الثورة بوبلاش هي البوليسية ("o0) أي البوليسية بعد ما ضربوا و هانو لعباد و فصعوا وقت إلي الرجال تعس بسكاكين ضد ميليشيات بسلاح و ما خفوش.. زادوهم  الفلوس و حب يعملولهم نقابة و هذا الكل و مش راضين علينا و شطرهم ما رجعش يخدم و إلي خدم ما يعمل شي..الحاجة إلي خلت البركجات في كل بلاصة (شكراً أيها البوليس البصاص و ربي يخلينا الجيش).

الناس هذي كلها رفعت شعار"إركب في ترينو الثورة بوبلاش.."  و قبل ما رنهاش تتكلم و لا تتجرئ تقول زدني دورو (جاهة الشيء في طبق من ذهب ).

  المشكلة إلي الشباب إلي قام بالانتفاضة و طالب بالشغل ساكت و فاهم اللعبة و يغزر لبعيد وقت ما تكمل الاصلاحات السياسية إلي هي الأولوية اخطا ألمم و الشهرية و المضربين  إلي حب يردوا الثورة من دون لا أخلاق و لا قيمة الكرامة والحرية "خبز وماء و بن علي..نفكروهم كان نساو" و إلي هما اليوم يتلفوا في مطالب الثورة الحقيقية و قاعدين يغطو عليها  .

مطالبنا الأساسية و قبل أي حوار  هي مجلس تأسيسي و دستور جديد و إقامة نظام برلماني يضمن حقوق الجميع و إنتخابات نزيهة بمراقبة دولية..و من مبعد نحكيو في مشاكل الشغل و الزيادات في ضل حكومة شرعية اختارها الشعب.

الناس الكل متفقين على الهدف البعيد من إصلاحات و غيروا أما موش بالدنأة هذي..و مازال ..مازال.

الغنوشي : للثاني مرة غلطوني..خرررررررف

تحت هذي الصورة توا كتب راشد الغنوشي إنو "عمار" حجبلو الموقع متعاوا  و هذا كلام موش صحيح و بدا يتيتم و يبكي و يشكي مالقمع و الظلم إلي تتعرضلو حركته كما ستانسنة...فالميلشي حب يقول لحركة النهضة" كفااااانا براس الحنينة":

-كفانا براس الحنينة ماكذبتو علينا 20 سنة و قلتولنا رنا خطينا أحداث    باب سويقة (يضربوا في النساء إلي موش متحجبين بماء الفرق و حرق لجنة تنسيق التجمع مما أدى إلى مقتل شخصين) و توا جايين تعترفولنا.

-  كفانا براس الحنينة ما سكتوا على جريمة باب سويقة و "الساكت عن ألحق شيطان أخرس" 

-كفانا براس الحنينة من انك تسكر صفحتك و تقول راهو عمار سكرهلي و أنا ندافع على حرية التعبير( تستخيلنا ليبية رنا توانسة و نفهمولهة ) و إلي يعمل هلعملة أكبر منافق.

-كفانا براس الحنينة انك تطلب تأشيرة متع حزب قبل ما يتنقح الدستور ويتنضم قانون احزاب جديد و انتي تعرف إلي القانون التونسي ما يسمحلك بها بمأنو يفصل بين الدولة و الدين و مبعد تقول ضلموني و قمعوني .

-كفانا براس الحنينة ركوب على الأحداث  راكم عملتو العار.

-كفانا براس الحنينة  ماللغة متاع خطينا و أقصونا و تغطية الشمس بعين الغربال و انتوما حركة مدانة في التسعينات مالراي العام التونسي باستعمال العنف.

-كفانا براس الحنينة من غلطوني في التسعينات و توا زادة كي سكرت  صفحتك و لا شعملتلهة غلطوك!!!!!!!!!

-كفانا براس الحنينة... راكم كثرتولهة لعب صبياني مع أولاد الثورة .

النهضة في تونس..( ضحك على الذقون)

رجعت حركة النهضة مع رجوع راشد الغنوشي بالهلالو في تونس خاصةً إلي هوما طلبوا رخصة عمل قانوني مبارح ( صباااااح الخييير..على بابك يا كريم) وانا واحد مالناس كمواطن تونسي مسلم نتسإل شنية في خطاب راشد الغنوشي إلي جابو جديد غير المناداة بالديمقراطية و الحرية..وبالله شنية الفرق بنو وبين الأحزاب "العلمانية"؟؟؟؟؟

أنا كمليشي تونسي مذبية في دولة لائكية تحترم كل الأديان و الأفكار و المعتقدات داخل الدولة من غير أي اقصاء و نرى إلي كل تونسي حر في دينو و إلي حب يطول لحيتو.. يطول.و إلي تحب تتحجب.. تتحجب و إلي يحب يمشي يبلعو.. يبلعو.

المشكلة إلي السيد هذا جاب الصيد من وذنوا كي يحكيلنة على دولة ديمقراطية و تحترم حرية الأفراد ( مع العلم أنهم بش يقعدوا يتيتمو على حكاية اعتقالهم و نفيهم و تشويه صورتهم..حب يلقوها سبة) ..و ما زدونا شي بطبيعة عن برنامجهم طويل الأمد(أهوكة يسايسو فينا..) يراو إلي الظروف متاع الشباب و ثقافته متسمحلوش باش يستوعب أحكام الشريعة إلي في الأخير هي غايتهم من غير ما يقعدوا يلبسونا في المسكوات. 

أنا نرى و من غير إقصاء إلي حركة النهضة.. هي حركة تعتمد سياسة المراحل (دخلوها تونس..وبش يوفوهة إيران) و إلي هي تفلم علينا بش تسترجع قاعدتها الجماهرية و بش نراوهة حاضرة بقوة في الإنتخابات البرلمانية.

حركة النهضة أنا نشبها بالإخوان المسلمين في مصر موش بالإسلام السياسي في تركيا و إلي إذا انتشرت ،بلادنا تولي كي مصر حتى طفلة معاد تمشي مش متحجبة في تونس خاطرو شي مفروض معنويا مالغزرت متاع لعباد و مش عن إقتناع.

أنا ننصح حركة النهضة بش تمشي تحل جمعية خيرلهة...خاطر اللعبة السياسية بش تتقلب عليها خاطر الشعب التونسي اليوم فيقلها .

و مازال..مازال.

البغل تبدل و الكريطة هي هي..

"الخطاب مسرحية... و القضية هي هي" هكا التونسة وقفوا يعيطو قدام وزارة الداخلية و يطالبوا بأقالة بن علي الرئيس المطرود من بلادنا. الناس الكل كانت تصيح من غير خوف إلي زرعوا فينا النظام الاستبدادي و تتفرج في الشرطة الفنية إلي تصاور فينا أما قلنا أني الخوف تنحى و بن علي على برا و إلي باش يصير خلي يصير.

بن علي هرب ليلتها و بمساعدة محمد الغنوشي و هذا لا شك فيه. الحاصل إنو بعد ما تهنينا عالمعلم فصع تم العمل بالدستور و تولي رئيس البرلمان الرئاسة الشرعية و الموقتة حتى إجراء إنتخابات في ضرف شهرين كما ينص الدستور و إعلان حكومة انتقالية فيها 3 معارضين و 6 من التجمع و الباقي مستقيلين كما زدنا العفو عن المساجين السياسيين و فتح تحقيق في المجريات الأخيرة.

أما زادة "المشاكل الأساسية السياسية هي هي"، نحنا اليوم في فراج يا نعدوه سلامات يا***** على خاطر التجمع مازال موجود برموز الفساد متعوا في قوى الحية في السلطة و اخطرها وزارة الداخلية و الخارجية و الدفاع...و سؤال: علاش هوما يتولو المناصب الحساسة في البلاد إلي فيها المشاكل متاعنا خاصةً الحلول الأمنية الي ديمة نحكو عليها ؟ هذا يخلينا نفكرو إلي إلي القضية هي هي و لزمنا نتخلصو من التجمع و رموزو اليوم قبل غدوة مدمنا مازلنا سخان.

نحنا قضينا على إلي بنا الهيكل متاع الفساد و الاستبداد هذا و مازال الهيكل في حد ذاتو موجود.

نردو بالنا راهو بن علي برسمي شرير.

سؤال لرئيس البلاد؟

انتحارات، مظاهرات،اعتقالات،تتفيه إعلامي،،تعنيف،تكسير ، تخريب،احتجاجات، قتلى،جرحى،مواجهات،اشتباكات،اعتصمات،خطابات،حرب صحافية،توعدات، بوليسية في كل تاركينة و جيش في البلاد و..........

و السؤال ألي على بال كل واحد هو وين ماشين ؟

يا رئيس البلاد نحب نسئلك ألوين مازلت طالع في خطابات و قررات و تعديلات ما تزيد كان تهيج العباد؟ علاه في دولة القانون و المؤسسات الشعب ما عندوش lلحق في التعبير الحر و التظاهر السلمي ؟ علاه الشباب و الطلبة و المحامون و العاملون و غيرهم كي يجيو يتكلموا تواجهم بالمتراك و غاز و الرصاص البلاستيكي و الحي ؟ علاه تحكينا عالمكاسب و نحنا غارقين في الرشوة و الفساد؟ علاه نحنا دولة الشعارات و الكلام و الفعل يجيبوا ربي؟علاه نحنا دولة بوليسية تراه في الاختلاف و حقوق الانسان خيانة و تضليل و إرهاب؟ علاه ما فماش تعددية في المنظمات و الأحزاب؟ علاه ما تحنيش 404 ؟ علاه فلوس شعب في بنوك البرة و نحنا لنا ملقيناش ؟ علاه طرابلسية و ماطرية عندهم فلوسنا و نحنا ما عناش؟و علاه اليوم ترمينا في العظم ياخي نحنا عندك كلاب؟ علاه برحمة بوك علاه...؟

23 سنة طويلة....سيبنا عاد.. رنا هجنا و طرتنا و كل ما تزيد تكبس نزيدو معاك .. و مازال مازال.

بروفيل عماد طرابلسي 404..و تقولوا عمار خايب

 في التصويرة فما الجواب متاع عماد عن اتهاماته بسرقة أموال الشعب... و يقول انوا فلوسو جيا بعرق جبينو و إلي موش هو ألي يملك بنك (إسلامي زعمة؟) و لا عندو أسهم في تونيزيانا و تليكوم و لا عندو شركات كراهب و ..... و الباقي إفهم وحدك . زعمة هذي بوادر إنشقاق في صفوف العائلة الحاكمة و بدياًن تهرب من تحمل المسؤوليات ولىا عماد حب يفدلك معا نسيبوا؟ أما صاحبنا صخر ما سكتش و رمالوا صخرة بو 4004.... و اخدم يا عمار
مع العلم إنو عماد فهم روحوا قام بفسخ ردوا مباشرةً بعد ما سكرولو الصفحة متاعو