jeudi 7 juillet 2011

علاش عملنا ثورة؟

علاش عملنا ثورة؟

عملنا الثورة بش تولي تونس لائكية؟ 
لا 
عملنا الثورة بش تولي تونس خلافة؟ 
لا 
عملنا الثورة بش نبدلو الهوية العربية الإسلامية ؟ 
لا 
عملنا الثورة بش تطلع الأحزاب تحكي بإسمنا ؟ 
لا 
عملنا الثورة بش نمنعوا التطبيع مع اسرئيل ؟ 
لا 
عملنا الثورة بش يجي طارق المكي من كندا؟ 
أكيد لا 



ملة علاش عملنا الثورة ؟ 

عملنا الثورة بش البوليس يحترمني في الشارع و ما يطلعنيش في الباقا يضربني ؟ 
أي 
عملنا الثورة بش نضمنوا حرمتنا الجسدية؟ 
أي 
عملنا الثورة بش نوليو احرار؟ 
أي 
عملنا الثورة بش نخدمو و ما نقعدوش بطالة ؟ 
أي 
عملنا الثورة بش يتشدو السراق و يتحطوا في الحبس و نضمنوا حقنا ؟ 
أي 
عملنا الثورة بش نقضيو على الظلم؟ 
أي 

ملة وينو هذا الكل ما فماش؟ 
كل يوم نحلوا التلفزة بش نسمعو خبر يفرح و ما نسمعو كان الكارثة وأختها؟ و مازلنا نحلوا التلفزة و الفيسبوك على أمل... 

خوانجية و ماسونية و صهيونية و لائكية و احزاب زادت و احزاب نقصت و الشامبيونا من دون حضور جمهور و بركجات و ناس تقتل في بعضها و ما بين كل نصبة و نصبة و ورى كل نصبة تلقى نصبة و برشة فوضى و.....و..إلخ 



سيبنا قرايتنا و خدمنا و هبطنا لشارع بش ناكلو طرايح ، نتضربوا ، نتهانو ، نموتوا مش بش تطلع كمشة نخبة مزمرة تحكي على مشاغلها الأبستيسوسيوزومارجية..!!أما بش نوليو مواطنين حقيقيين لنا حقوق و واجبات. 


عملنا الثورة بش نوليو عباد. 

1 commentaire:

  1. لماذا قمنا بالثورة؟؟؟ أنا موش عارف لماذا قمنا بالثورة! أنا كنت في الحمام ساعتها
    #Epic

    RépondreSupprimer