dimanche 29 juillet 2012

حكاية التعويض



عندي برشة منقطع عن عالم السياسة و السياسيين ، صيافي..واحد إرتاح من القراية و تكسير الراس، بعد على الفايسبوك و الأخبار إلي هابطة كي الشتا، الفايسبوك أقوى من القنوات الإخبارية، أي حاجة تسير تهبط بالوقت و المعلومات قريب تسبق الخبر عن قريب أما امش هذا الموضوع، الموضوع هو الحديث الدائر على التعويضات إلي الحكومة قررت تعطيها للمساجين السياسيين السابقين. 

حليت الفايسبوك و تصدمت كي لقيت الناس الكل تسب في المناضلين إلي ياما عناو البارح  و قساو بش يقولوا كلمتهم و يدافعوا على التونسي و حق التونسي و إلي دخلوا السجون و تعذبوا..لقيت الناس تقول "المناضلين سراق" و "أنا ضربة بماء الفرق بش نخو تعويض و انتي وقتاش؟" و "حبوا يعملوا إنقلاب و حبوا ياخذوا تعويض!!"...أي نعم قريت برشة حاجات من هالنوع و مانيش مصدق، فش يخرفوا؟ 

إلي يكرهوا النهضة أو إلي ضد الإسلاميين من جهة قلك هذم إرهابيين و مش من حقهم ياخذوا حتى فرنك و فما شكون قال النهضة حب تعطي لجماعتها الفلوس و هما كمشة سراق و فما حتى شكون وصلت بيه الوقاحة و قال "و شكون قالوا يحل فمو هو في عهد بن علي؟"
و فما شكون مشى بكلام حمة الهمامي كي قال إنو ما يقبلش التعويض على الربطية إلي شدها و عمم الحكاية على جميع اليساريين و بالتالي الإسلامي هو انسان عديم الضمير و سارق.   
الكلام هذا ما نجمش نرد عليه أولاً لأنه فلسفياً ياسر قوي على مخي و ثانياً لأني صايم و خليني صايم خير. 

مانيش بش نطول عليكم برشة، أنا الناس الكل تعرف إلي لاني نهضاوي لا طحان سلطة و مانيش مناضل عدا حياتو في السجون بش نقبض حتى مليم. 
التعويض هو حق لكل سجين سياسي تعرض للقمع و التعذيب أيام بن علي، فما ناس تكسرت من خدمها أيام بن علي بسبب أرائها و إنتماأتها السياسية ، اساتذة، معلمين، موظفين حكوميين، محامين... و دخلوا للحبوسات و خلاو عايلاتهم وراهم يعانيو. الدولة هي من المفروض الحمية لحقوق المواطن التونسي و المواطن التونسي انتهكت كرامته و حقوقه و لقى روحو يدفع في سنين حبس و عذاب على خاطر "كلمة". هالإنسان ياخي مش من حقو نردولوا كرامتوا و نعوضولو السنين إلي تظلم فيهم و عايلتو الله يعلم كيفاه نجمت تعيش من غيره. أيه حقو و نص و مش مزية. 

الناس إلي تصطاد في الماء العكر شقالي شقتلك ارهابين و يضربوا في الناس بالماء الفرق هو انسان من أقذر ما رات عيني ، يا سيدي الإسلامين فيهم الألاف من الناس إلي لا عملت لا ايدهم لا راسهم و تحشو في الحبس ، الحالات إلي تحكي عليها محسوبة على مساجيين الحق العام يا سطل و مش على المساجين السياسيين. 

أما زادة قبل ما نحكي على حق التعويض لازم قبل ما نقروا التعويض تتم المحاسبة، شكون عذب ؟ شكون حكم بالسجن ؟ شكون حقق ؟ 
شكون قتل ؟...الناس هذي لازم تتحاسب اليوم قبل غدوة و إلا التعويض ما يكون عندو حتى معنى. خاطر الدولة اليوم ماهيش قادرة بش تحمي حقوق المواطن خاصةً و أن التنكيل بالنقابيين و الإعتداء على حقوق الإنسان في المراكز و السجون مازال مستمر و بطريقة ممنهجة. و إلا السجناء الاسياسيين مش عباد ؟ التعويض إذا شمل السياسيين اليوم لازم يتعمم  و يشمل الناس إلي تنتهك حقوقها و بش يكون الية محاسبة و ضغط على السلطة. فمثلاً اليوم واحد يوقفوه، يفشخوه و كي ياقف قدام القاضي و هو مدمدم حاجة عادية ، تقول عليه مش انسان! لازم البوليس يعرف إلي كي هو بش يشد يفشخ العباد بش يتحاسب و أنا إلي قام بيه الكل يطيح في الماء. 
التعويض في ظل دولة لا تحاسب ، لا تحترم حق النشاط السياسي و النقابي، لا تستطيع وقف التعذيب في السجون و المراكز هي ليست الدولة إلي بش تعوض خاطر شكون يعرف بابا مبارح في الحبس و إليوم انجم نكون أنا. 

التعويض حاجة بديهية أما لازم فما شروط بش تنجم تتحقق خاصةً وقتلي نحكيو على عدالة انتقالية و هي غايبة. 

قبل ما تعوضني أضمنلي حقي و حق ولادي غدوة. 

jeudi 14 juin 2012

الخنن



هذا المقال مش أنا كاتبوا ، كتبوا صديق فيسبوكي اسمو "Ramzy Djr" يحلل فيه شصاير ليوم في البلاد على خلفية حظر التجول و الهبة السلفية من أجل "الإعتداء على المقدسات " و أعمال العنف و الأحكام العسكرية في قضايا  الشهداء و غيره
 https://www.facebook.com/Ramzy.AA
----------------------------------------- 




الجيش .... و سياسة لهي زك امو في حكاية نسيه حكاية.. كان مفهمش ضحكو ....و اعطيهولو 




لا سلفية لا ز بي...موبنة الانقلاب العسكري تحيييكم و تعصبلكم في صرامكمخمم شوية,,,,كان مافهمتش اللي موبنة الجيش ورا تحريك البعابص الكلعاود خمم ميسالشعلى كل كل واحد حر في رايو,,,,,الجيش ينيك في راس براس و باعثكم تنييكو و يخرج حاشيهولكم في الللخر....تسعة سنين وهو ينيك في التحقيقات و يأجل في الجلسات ...في نهار ينيك يفجر مواهبو يفصل في زبور ام القضايا االكل فرد ضربة تقول الزبي التحقيقات فورفي .....كي الوردانين كي القصرين كي ام التمر كي زك امهم القحبة.... من فوق زيد نيك الحظر التجول و هكاكة تتتعدى الاحكام inaperçus و اللي مو عاجب صرم امو الاحكام ...و يحب يتظاهر نيك طبق عليه القانون و سميه مخرب تنيك عصفورين بضربة وحدة ...الزبي ؟؟؟؟؟؟بن علي قطع نهار 14 ناك 20 سنة عل الوردانين الللي صارت نهار 16 بن علي ناك المؤبد على القصرين وتالة...في حين الحاج قاسم خذا 12 اكهو؟؟؟؟ اما منصف لعجيمي براءة حشاه.طلع ملايكة كيما قالالزبي؟؟؟؟ و re الزبي ؟؟؟ياخي قانون شكون هذا؟؟؟ والا تسكتو في زبوبنا بالقحب و الدروشة؟ياخي بن علي ييتحاكم فاعل اصلي؟ بمعنى هو ضرب بالكرتوش. و ا لا هو شريك بالفعلة ؟ياخي القانون موش يقلك اللي الشركاء في الجريمة يعاقبون بالتساوي؟بمفهوم ممسؤرلية الرئيس عن فعل المرؤؤؤس؟مالا يا االزين ينيك 12 عام كي الحاج قاسم, ولا الحاج ق ينيك كبوط تأبيدة كي سيدووالا الازبر ينيكو البراءة كي المنفذ المنصف العجيمي و ياناس ما كان باس....يابوقلب في نفس النهار الي يطلع فيه المنصف العجيمي صح ستار وامورو هانيه وما عليه شيء النيابه العمومية تصدر بطاقة جلب في حق عدنان الحاجي .اون بلوس…دييييييير...موش قالو الللي الادلة فسخو صرم امها ؟ كيفاش حكمتو مالا؟ملللللخر.......الجيش بعدما ناك الدرس مالللي صار في مصر و باش ميتحشالوش كيما االطنطاوي هو بطبيعتو بدا يعمل الريحة بقضية رمزي بالطيبي هاو ناكلكم قصة عربي فيلم السلفية الللي هوما بهايم دايور و ديما هازين القعدة وحدهم (دايور كيماصار في الدزاير) وفي جرتهم تلهي الناس و تحسسسهم بالinsécurité و الحاجة للجيش, وتزيد تحشيه وتشكٌب بالحية تفرض حضر التجول لا حد يكسرلك نمٌك بحكاية مظاهرات ضد الاحكام البهلوانية متاع المحكمة العص-كرية و لا الجيش ميبون و لرشيد سفاح و لا زب لمبوط...و يموت الحب كيما ماتتت حكاية قناصة الجيش اللي صورهم ENVOYE SPECIALو حكاية الجنرال سكيك وغيرو ووغيرو...الناس لاهية خايفة من السلفية والا بش تقعد تبعبص في احكام الجيش؟مؤبد لبن علي؟ اووووووووووووه يا زبي شو هاك العصبة الكبيرة....خريتو فيهباي ذو واي ....نيكوني كان السعودية رجعت بن علي و رشيد siffleur la fin de la recréation le savait bien merde !!!لللي عندو عصبة كاسحة وفي زك امو ريحة الريحة مالرجولية ملجيش.....يجيب رضا قريرة ديراكت قدام التلفزة يعصر زك امو تو يطيح شطر زك ام كولونالات وزارة الدفاع لميشال اليو ماري في فرانساياخي الللي خرج بن علي اسكورتي موش رشيد عمار؟ بداو ينيكو راس براس يخوفو هاذا بهذا مبعد يجيو هوما المنقذ و حامي الحمى و الدين بش يحميو التونسي المسكين من السلفيين الارهابين الي كان تنحي من زبور امهم مخابرات الجيش و المرتزقة و البوليسية ميعبيوش ستاد المرسى واصرف يا حكومة....كومسيونات الجنرالات في صفقات السلاح" لحماية الوطن " هههههههع ....مالا زبي؟ وكان حشاوه ينيكو الحكم في تونس .....


تحيا الذات الالاهسكرية.....سؤال : طلع شكون الوزير الوحيد الللي ما تزعكش و ما تمسش من حكومة الغنوشي+ شكون قائد جيش البر الللي خدم مع بن علي و طيح طيارة الجنرال سكيك ومازال لتوة بطل الثورة INDICE : L’homme qui a dit Non à Ben Ali …(سؤال يستثني مخابرات العسكر المنشرين بالفو بروفيل في فايبوك)

mercredi 23 mai 2012

رجعولنا حزب الدستور

كثر في المديدة الإخرة الحديث على التجمع الدستوري الديمقراطي و حق رجوع الدساترة إلى الحياة السياسية و أن مش معقول إقسائهم ، العباد إلي تحكي هكا من العامة هي الناس إلي خايفة من النهضة و سيطرتها اليوم على دواليب الدولة من معتمديات و ولايات خاصةً ، الناس هذي خايفة من خطر الإسلام السياسي خاصةً بعد إنتشار ظاهرة السلفيين البريود ما بعد فوز النهضة في الإنتخابات 

السياسة كما يعرفوا الطامة و العامة هي لعبة إمسخة و قذرة إلى أبعد الحدود، حتى لو كان فما ثلة من السذج ما يعتقدوش هذا، الأكيد أنوا الخايفين من الحركة الإسلامية ليوم يعرفوا الشي هذا مليح ، و هذاكا علاه هما اليوم أكثر ناس متحمسين إلى رجوع "الدساترة النظاف" بش يواجهوا بها المخاوف متاعهم ، أي بش يحاولوا يلقاو كونتر بوا لنهضة و يكسرها، شي أخر ما ينجم يفسر أنوا انسان عاقل يحب رجوع حزب مسح به القاعة تحت ما يسمى بالدساترة، أي نعم الدساترة إلي أسسوا للدكتاتورية في تونس و السبب ورى المتلبعت برجوعهم هو ضعف المعارضة على الساحة السياسية .





قبل ما نحكي على الدساترة بش نكونوا واضحين ، الحزب الحر الدستوري التونسي أو الحزب الإشتراكي الدستوري أو التجمع الدستوري الديمقراطي هما نفس الحزب ، لا فرق إلا في التسميات ، تجمعي أو دستوري هي بدها الحكاية ، الحاج موسى موسى الحاج ، معناها من غير مغالطات و من غير لغة تعڨريب. 

الناس إلي تأمن بعودة التجمعين تحت قناع الدساترة ، هي ناس تأمن بالفكر التحديثي و تحب تتفادى بكل الطرق تونستان، و لكن الناس هذي ناسية أنوا الدساترة هي ناس صادرت حرية الفكر و الأبداع في تونس ، أن التجمع في تونس عفس على الكفاءات إلي ما تهزش الطحين ، أن التحديث كان ينجم يكون ما خير و عن وعي و الإمكانية هذي كانت موجودة و لو كان صارت رهو معناش شعب ما يعرش شمعناها علمانية و يستخيلها كفر ، مش التونسي بهيم بطبعه رهو ، أما هذا الفكر إلي تحكيو عليه متع الدساترة إلي حكم 50 سنة خلنا بهايم، لو  كان جا الفكر التحديثي راسخ في ثقافتنا رهوا قضية الشريعة ماهيش محل نقاش اليوم.
قداش تفكرني الناس إلي تحب رجوع  الدساترة في السلفيين إلي يكرههم، الحنين إلى العصر الذهبي و عهد الطفرة، بالله شنية الفرق  بين السلفي إلي يشوف في الخلافة عهد الفتوحات و إزدهار الحضارة و يحن لفترة وهمية في مخو و بين دستوري يحن إلى عهد الإنفتاح و تحرير المرأة و تأسيس الدولة في شخص بورقيبة؟ شنية الفرق بين نهضاوي يرى في الشيخ راشد الغنوشي رضي الله عنه  القديس إلي يعطيه تيك للجنة و بين متفتح حداثي يرى في الباجي "ماتريكس" بورقيبة  المنقد والزعيم الأوحد و القادر على وقف مد العنف السلفي و إدارة شؤون البلاد؟  الزوز كيف كيف مكرزين من الوضع و عايشين على الاوهام.

الناس إلي تلوم على الناس كيفاش صوتت لنهضة و تلومهم و تقول التونسي ذاكرته ضعيفة لأنها نست أحداث العنف إلي قامت بها (ماء الفرق و التفجيرات و غيروا) في التسعينات هي زادة تبركالله عليها ذاكرتها كسكاس، نسات فيسع عمليات النهب و الأكتاف و الأقصاء و الظلم و القهر إلي عشناه تحت حكم الدساترة، المفروض كان جات الدنيا دنيا ما فماش تجمعي عندو الحق من هنا فصاعداً في أي منصب سياسي كان ، بكبيرهم بصغيرهم ن ابدا من الطحانة إلي كانت تصفق في الشعبة وقتلي فما ناس ناضلت و ماتت و تعذبت في السجون ، هو لاهي يصفق و يخدم صباب، انسان يطحن للحزب هيمن على الدولة و استملكها و الناس الكل كانت تعرف الشي هذا ، حتى انسان ماهو بريء ، لكلها عاقلة و تعرف شتعمل و لكلها لزم تتحمل مسؤليتها و كان من الواجب تتحاكم.

من المؤكد أن النهضة هي حزب بش يكون دكتاتوري ، لأنو بكل بساطة حزب يحكي على تطبيق دين أم الشريعة يستحيل يكون ديمقراطي خاطرها تتنافى مع دين بو الديمقراطية، و لكن في نفس الوقت مافماش بديل بحجمها التونسي عندو فيه الثقة حتى حزب التكتل إلي برشة ناس كانت عقدت فيه النوارة ، تحالف مع أكبر عدو للناس إلي صوتتله مثلاً (أكبر عملية تحيل في الانتخبات قام بها التكتل برجولية و صحة لامو، بلاش كلمة) ، في المقابل احزاب المعارضة كي البي دي بي و غيروا ياسر متشة و ما يتعملش عليها بصراحة ، مافماش بديل [و يستحيل يكون البديل الثوري] و مخرج من الحكاية و من هنا تولدت فكرة رجوع  الدساترة، يقول المثل "في الهم عندك ما تختار". 

أما زادة ما ننساوش نفرحوا بأحببنا النهضوين و هما من أهم أسباب الحديث عن رجوع الدساترة ، مش اكاكا بارك أما زادة عطاو مشروعية رجوع  التجمع ، سيدي الشيخ رضي الله عنه إستقطب في حزبه الإسلامي النقي النظيف جداااااا التجمعيين، أيه نعم التجمعين الملتحين(هداهم ربي)، حتى أن الحبيب الصيد التجمعي جملاااا و النظيف جدااااا شادد منصب مستشار لدى رئيس الحكومة. و لهنا يقول القايل "حرام علينا ، حلال عليكم" و لنا نرجعوا لإزدواجية خطاب النهضة فمن جهة تهاجم عودة التجمع  و من جهة أخرى تخدم بيهم.جزار يعظم على مراڨزي ، كلهم سياسين و كلهم إمسخين.




نحنا فين في هذا الكل نحنا لنا مع النهضة و لنا مع عودة التجمع ، الزوز الشكارة و البحر ، مفماش فرق و أكثر من هكا أنا مع إعدام التجمع الدستوري سياسياً و إلى الأبد ، بنسبة ليا كانك انسان بالحق تأمن بالحرية و الديمقراطية و حقوق  الإنسان فمكتوبلك تعيش وتموت و انتي تقول في كلمة لا. خارج هذا الإطار و في إطار في الهم عندي ما نختار تنجم تسكر رب فمك و ما تحكلنا لا على حقوق الانسان لا دين والديك. 




lundi 14 mai 2012

اللون خراوي مثلكم

تبرتاجي صورة بروفيل تعاطفاً مع الأسرى الفلسطنيين ، أيه و من بعد ؟ خريت فيه ؟ حررت فلسطين ؟ حققت مطلب الأسرى ؟ مش كان ساندت جرحى الثورة خير و تلهيت في همك ؟ ملة بوهالي ، خمم في روحك قبل ما تخمم في غيرك، المسلمين فالحين كى في الحكاية الفارغة...إلخ 
لا أما برتجيت التصويرة خطرني بالحق متضامن مع الأسرى ، صحيح أنا حتى شي و مني قادر نعمل شي لفلسطين، الصورة ماهيش بش تزعزع الكيان الإسرائيلي   ، أما خممت و قلت كان جيت أنا أسير و نعرف إلي فما واحد بركة في العالم خمم و لو لثانية فيا ، بش نفرح و نعرف إلي أنا مش الوحيد إلي يخمم إلي هو مظلوم وعندو الحق، مش مهم شكون إلي خمم فيا نشالله يكون حتى حماص، المهم إلي تفكرني و قال كلمة في حقي. أكسيون تقول بها إلي أنا موجود و عندي حق الحياة تمثل برشة حاجات و لو كانت رمزية.
أنا مانيش مسلم بالضرورة بش نأمن إلي فما سجين مظلوم في إسرائيل، قضية فلسطين أكثر قضية عادلة اليوم في العالم و لازم الناس الكل تعرف الشي هذا، أنا انسان قبل ما نكون عندي أي دين، كون المسلمين تاجروا بها مش ذنبي ، برشة قالوا شبي الجبالي ما يخرج يندد بالكيان الصهيوني ؟ أيه أهوكة زادة بن علي في 2008 عمل 3 أيام حداد على فلسطين و العلم منكوس، أهوكة أحمد نجادي قال سأرمي بإسرائيل في البحر ، خرى فيه ! و انتوما كي قال هو اكاكا خريتو فيه ؟ الجبالي مبارح يعنق في ماكين و ينجم غدوة يندد بإسرائيل، حاجة مش صعيبة، تنجم تقول طز في أمريكا وإسرائيل زادة و تكون عميل، أما لكلهم كيف كيف ، لكلهم كذابة و منافقين. 
صحيح نحن غارقين في الخرى كما لون صورة إلي كي الخرى ، كيف وضعنا يعني، أما شنية الفرق بينكم وبين تجار الشعارات و السياسين ، إستغلتوا الفرصة بش  تحكيو على جرحى الثورة و تقولوا هذم أولى ! توا تفكرتوا جرحى الثورة عندهم أكثر من عام ! مش معناها إلي أنا ضد انكم تحكيو على جرحى الثورة ، بالعكس ، أما انك تجي ضد وضع صورة تضامن مع الأسرى بش تحط صورة جريح الثورة ، هذا ما يتسماش تفيسخ أو بالأحرى تقوحيب ؟!! معناها الوبنة السياسية نحيوها. و صحيح إلي برشة من طحانة السلطة رافعين شعار فلسطين و هذي فرصة بش تفكرهم بمواقف حكومتهم المخزية و صورة "عنقني يا ماكين" مازلت تشهد.
ناس قبل يقلك شنية الفائدة من المظاهرات ، ماك بش تخرج تنبح كي الكلب للداركم و الوضع مش بش يتبدل ، يعني بش تخراو فيه! نفس الفكرة، تنطبق على حكاية هالتصويرة المحمومة، يا ولدي قضية فلسطين قضية إنسانية و الصورة المنتشرة هي مجرد حركة رمزية و كما قال عزيز عمامي :لو كان نقدر نتضامن مع فلسطين بخيت صباتي نتضامن
في النهاية نقصولنا من تشقشيق الحناك و اعطيو كل حاجات حقها.







                                                           

jeudi 22 mars 2012

ربي! ما فماش

قبل ما نكتب أي كلمة أو حرف نحب نقول إلي التدوينة هذي تنجم تفهمها كما تحب و إلي هي تحاول تحكي على الملحدين التوانسة، تحب تشوف الشخضية التونسية كفاه فهمت الإلحاد و كيفاش ولات ملحدة. إذا كنت مسلم غيور على دينك تمتلك الحقيقة و فهمت الدنيا هذي و ما عليها ما غير ما تقرأ و تسرح بخيالك بعيد إلى أفكار كما يحارب في الإسلام و ينشر في الكفر و يثير في الفتنة و في المقابل إذا كنت لا ديني و تقول ملة ضربة باهية للإسلام نجم نقلك ضربة على كرايمك. 
ملاحظة: و أنا نكتب في التدوينة مشيت من منطلق إلي أنا مانيش ملحد، مانيش مسلم ، مانيش ديني، مانيش ربوبي، ماني حتى شي...أنا انسان حب يفهم بوان بار.
Véro، Otail، Clou،Pirate لكلها شخضيات حقيقية حكيت معها و تحب تحافض على الأنونيمة متاعها.  




ساعة أول حاجة إلي بش نكتبوا الكل مبني على حوارات عملتها مع ملحدين توانسة، و مهمش من المشاهير إلي يمدوا خلقتهم في التلفزة و وسائل الإعلام بصفة عامة، هما عباد عاديين فيهم إلي مازال أتديون و إلي يخدم و إلي يحضر في رسالة الدكتورة متاعو..ملخر لكلها مثقفة و عندها ما تقول في روحها فكرياً. 



حكايتك منين بدات ؟

كل واحد عندو تجربتو الخاصة مع الإلحاد و العباد إلي حكيت معاهم الكل كانو مسلمين ، فيهم إلي كان يصلي و يصوم و يحفض القرأن ، فما إلي يصوم أكهو و إلي ما يعرف من الدين شي ، كل واحد وحكايتو و لنا بش نعطي أمثلة على أشخاص معينين:
Pirate مثلاً يقول  " قبل الثورة كنت نؤمن ببعض الكتاب و نكفر ببعضهم، بعد الثورة وليت نكفر بديربو الكل" ، إقتناع Pirate بنظرية التطور في الأساس هو خلاه يلوج في مسألة الإلحاد و يقرا كتب ، بنسبة ليه العلم الصحيح يثبت إلي الدين غالط و أن الله غير موجود
Clou تقول " وقتلي مرا إلي تجيب صغير ،و ما تلوجش عليه جملة، و تعمل روحها تصلي،و الأعباد يقدسوها و انتي تعرف إلي هي ساقطة،و الاعباد ما تمنيش.."، Clou كي بوها مات أمها قلبتها في ورثها و على خاطر أمها مدينة؛ الناس كذبها و صدقوا أمها ، من وقتها هي ولات ملحدة  وقتلي في مجتمع نقدسوا المظاهر، نمشو بكلام هذاكا يعرف ربي و ما يكذبش، وقتلي الدين يولي غطاء و مظهر تنجم تثور على المبادئ إلي تربيت عليها و تبعث الناس و تعيش في عالم لا فيه "لا ربي لا سيدي".
Otail: هو مثال على الإنسان إلي بحث ، حفض القرأن و اطلع على كتب الدين و إلي لقى أن القرأن غالط و ملئ بالخرافات، بنسبة كل ما تزيد تتعمق في الدين و تقارنوا بالأديان الأخرى تولي من الأول ربوبي و من ثم تولي ملحد. Otail طرح تحدي وأنا نحكي معاه " أكثر حاجة خلتني نلحد و نتأكد من بشرية القرأن هي خرافة ياجوج وماجوج و ذو القرنين و الشمس التي تغرب في عين حمأة"، "أنا نعلن و نتحدى، أنا مستعد نؤمن لو كان أي مسلم يقول وينهم ياجوج وماجوج".

من الحاجات الأخرى إلي تخلي الواحد يبعد على الدين هي النظرة الأحادية لدين و إقصاء الأخر إذا إختلف معك في الرأي، مثلاً غزوة شيوخ الدين لقنوات التلفزية ما تنجم تزيد تعزز هذا الموقف، الناس تأخذ كلامهم بالحقيقة المطلقة و توصل إلى حد تقديسهم ، إذا اعترضت معاهم فأعرف أن الناس مش بش ترحمك و تنجم حتى تكفرك، في حالات ينجم يكون الإلحاد إقصاء يفرضه عليك المجتمع.




 حكاية Otail مع الأخلاق:
كي تحكي مع واحد ملحد تخمم في حكاية الأخلاق  و تقول كي هو ما يمنش بالله معناها هو انسان عايش عالمهموتة و ما عندوش أخلاق، يعمل شيحب. لهنا Otail يقول أن أكثر ناس ما عندهمش أخلاق هما المسلمين و أن الدين يشجع على هذا. كيفاش ؟ فما حديث ورد في صحيح البخاري مثلاً يقول: 

أتيت النبي صلى الله عليه وسلم وعليه ثوب أبيض ، وهو نائم ، ثم أتيته وقد استيقظ ، فقال : ( ما من عبد قال : لا إله إلا الله ، ثم مات على ذلك إلا دخل الجنة ) . قلت : وإن زنى وإن سرق ؟ قال : ( وإن زنى وإن سرق ) . قلت : وإن زنى وإن سرق ؟ قال : ( وإن زنى وإن سرق ) . قلت : وإن زنى وإن سرق ؟ قال : ( وإن زنى وإن سرق على رغم أنف أبي ذر ) . وكان أبو ذر إذا حدث بهذا قال : وإن رغم أنف أبي ذر .
الراوي: أبو ذر الغفاري خلاصة الدرجة: صحيح 
و لهنا نراو من خلال هذا الحديث أن الإسلام يوبحلك تعمل كل شي (بركاج، قتل،سكر...) و من بعد يكفي انك تشهد قبل ما ترقد بش تدخل للجنة يعني قمت النفاق. الإسلام كما يراه Otail (إلي كان قبل مسلم مغلڨ و كل فرض في وقتوا ويحفض القرأن و يطلع على كتب الدين) هو لا أخلاقي خاصةً أنه يخلق الفتنة بين العباد و كان سبب حروب و تفرقة بين البشر.



حكاية Véro مع الكأس الذهب:

véro ترى إلي الله ما ينجمش يكون، ما ينجمش رب يغزر للعباد و هما يتعذبوا ، أطفال جنوب إفريقيا إلي يموتوا بالألاف في النهار '(16500 طفل يموت كل يوم من الجوع في جنوب أفريقيا) و الله قاعد راكش يتفرج فيهم ، فينو ؟ و على أنهي جنة نحكيو ؟ جنة فيها العسل تنجم تشربوا في كأس ذهب !!، Véro كي كانت صغيرة أستاذها قللها إلي في الجنة تنجم تشرب العسل في كأس ذهب، الحاجة إلي ما دخلتش لمخها من الصغرة مثلاً خاطر  الكأس هذا ينجم يكون عندو قيمة كان في عالمنا أما في دنيا أخرى فيها جنة، شنية فائدة هالكأس إذا كان الناس الكل عندها منو؟ كان جاء الذهب عند الناس الكل  راهو قيمتو من قيمة التراب. تصورات ما نجمتش تقبلهم، مش قويين على مخها ، أما خطرها تعلمت تخدم مخها. Pirate يمشي في نفس الفكرة إلي الله يتمنيك على العباد يقول مثلاً :" الديانات قاعدة اطمع في العباد بالجنة وقتلي هي كي هي توخر لتالي و تخمم فيها ترى إلي هي حكاية فارغة، 70 جارية، اش بش نعمل بيهم؟ وإلا الشراب! الإسلام شاف إلي الشراب يحبوه العرب و هو خايب قلك الشراب حرام!!!!!".




حكايتك مع فكرة الإلحاد: 

الإلحاد في مجتمع أغلبيته مسلمين، يأمنون بالله و النبي و الكتاب مش حاجة ساهلة و تطلب مجهود فكري كبير و ثقة كبيرة في النفس بنسبة ليا، تخرج مل ملة يعني انك تدخل في صراع مع نفسك و تتحدى العادات و الثقافة إلي تربيت عليها و إلي رضعتها في الكتاب، في الدار، في الشارع، مع أصحابك و أقرب الناس ليك..تتخلى على هذم الكل و تخرج من قشرة اسمها التقليد و تعمل لروحك شخضية و مباديء ما يحددهم حد كان انتي، عندك نظرة أخرى للعالم و تفسيرك الخاص. تخلق حدود لنفسك مش مربوطة بدين و انما مربوطة بعقل و قناعة و الأهم من هذا الكل كي سألت  Otail "هل انتي مرتاح مع نفسك توا ؟" جاوبني " توا أكثر وضوح،توا لعذاب وشك تنحى، توا وليت متصالح مع نفسي و مع العالم و المنطق، توا خرجت من كهف أفلاطون".
و في المقابل نشوفو Véro إلي هي زادة مرتاحة أما في نفس  الوقت خائفة من فكرة الموت، ما تنجمش تتصور نفسها عدم بعد الموت،  Véro ما تنجمش تقبل فكرة انها ما تكون حتى شيء، انها تكون مش موجودة و تقول " ما نتخيلش روحي مش موجودة و نحب نتمتع بلحواس متاعي الكل، أو موان نكون عرصة و نشوف الناس ماشية جاية..".



حكايتك مع المجتمع:

لزمنا نعرفو إنو الأشخاص إلي تحدثت معاهم الكل ينتمو بطريقة أو بأخرى ثقافياً حبوا و إلا كرهوا إلى مجتمع مسلم في حاجات معينة، في طريقة حديثهم و إلا حتى طبيعة علاقتهم الاجتماعية بحكم نشأتهم، مثلاً véro  محافظة على عذريتها، تقول انتي الواحد يستغرب و يقول شنية إلي منعها؟ ما يمشيش مخك لبعيد ماهيش "عفشة"، بالعكس أما بحكم  أنها تعيش في مجتمع يأمن بعذرية الفتاة أكثر من أي حاجة أخر، هي خاضعة للمبدأ هذا و قابلة اللعبة هذي بذكاء. إلي نحب نقولوا أن حتى ولو كان الملحد إختار عدم الإيمان بالدين و الإله و إختار لنفسوا ثنية يمشي فيها فهو ما ينجمش يخرج مالقشرة متاعو كلياً.





الملحد ما بداش ملحد بالفطرة ، هي حكاية طويلة بدات من ناس توانسة عاشوا  في مجتمع عندو عادات و تقاليدو، الحكاية تبدى بأسئلة ما تلقلهاش اجوبة، تحب تبحث، بعد مديدة تبدى تلوج و تفركس على اجوبة للاسئلة متاعك إلي محيرتك، برسك الكلهم مروا بفترة أنكروا  فيها الأديان، دخلوا  في مرحلة الشك، معظمهم مروا بمرحلة انتقالية يكون فيها الشخص ربوبي ، من ثم يولي ملحد.  الاسباب  تتعدد كان سألنا روحنا "اذاكى علاش ملحد؟" أما الأهم  إلي النظرة إلي   ممكن تعطها عليهم و تقول كي هما ملحدين كل شي عندهم مباح حاجة مش صحيحة، المبادئ و القيم إلي يحملها يدافعوا عليها بشراسة في علاقتهم العامة و الخاصة زادة إلي كي يقول اذاك العبد الملحد "بهيم"، ما ينجم يكون كان تصور غبي و مسكر على روحو، عايش في عالم ما فيه كان هو  خاطر هما عندهم أفكارهم و مواقفهم العقلانية و الأهم ملكل مرتاحين مع رواحهم .

هما توانسة و موجودين.

.........................................................................................................................
حكاية ياجوج و ماجوج : http://www.alzakera.eu/music/religon/religon-0087.htm
حكاية Otail مع الأخلاق: http://abouaicha.blogspot.fr/2010/12/blog-post_04.html



jeudi 15 mars 2012

الحيط يفهمني..انتي ما تفهمنيش

قبل ما نكتب حتى حرف نحب نقول إلي مانيش آنرشيست (و لو أني نحترم برشة هذا التوجه ) و حتى لو كنت آنرشيست مانيش بش نحشم من حد و تنجمو تضربولي عالطيارة. 

بعد ما جاني شلل فكري و إحباط معنوي بعد "الثورة"،و بعد الصدمة من التوجه إلي مشات فيه الأحزاب إلي ناضلت أيام بن علي و خاصةً بعد صعود التيارات الدينية مؤخراً إلي يدل على أمتريزم سياسي كبير عند المواطن و المجتمع بصفة عامة قررت نبعث الجميع و نركز مع ظاهرة جديدة ضاربة المدة اللخرة، هي الڨروبات كما زواولة و مولوتوف و les rebelles.....


الڨروبات  الطالعة لكلها عندها توجه سياسي بالدرجة الأولى و لكن مش التوجه الحزبي إلي يحسب و يكمبس شنوا لازمو يقول و شنية يعمل بش يحصل على أكبر عدد من الكراسي و المقاعد في 'البار'لمانات، لا هي أخلاقياً خير من هكا، تحاول تطلع بالفكر و الوعي متع الاعباد مش العكس تهبطلو و تقولوا "الله يبارك، أي سيدي، عندك الحق  انتخبني و نعملك شتحب.."، و في نفس الوقت ما توصلش ميسجها بالطرق الراديكالية إلي تستعملها الجمعيات و الأحزاب متع الاجتمعات العامة وما تحكيش معاهم  من ورى الاكران ، الحيوط هي وسيلتها بش توصل فكرتها بلغة يفهمها ولد الحومة العربي و الشقنوص و المثقف و إلي عايش عالمهموتة و الزوالي و الكرزة و الطرطور....بلغة فهمت الجميع بلحق. تنجم زادة تعمل مراول بش تعرف بروحها ، تصور فيديوات تنشرها بالأنترنات و تعمل باجات...و الهدف متاعها يبقى واحد: بش نوصل صوتي حب من حب و كره من كرخ.


 تكريز هي أول حركة متع "آنرشيست" حلت الباب للحركات الجديدة، و كي نقول "آنرشيست" مش بمعنى كفار و لا يؤمنون بالله و رسوله و جد والديكم الكلب أما بمعنى رفض السلطة إلي تستغل في القوى إلي عندها بش تقمع ، تضرب، تظلم العباد، خاطر الڨروبات  ماهيش ضد السلطة كسلطة، أما ضد العنف و الظلم إلي تمارس فيه السلطة بإسم "القانون". في دولة ما تحترمش حقوق الإنسان و تساوم بحرية الفرد تنجم تفهم علاش الشباب إختار الحيوط وسيلة بش يوصل صوتوا و مش الأحزاب و الجمعيات. 

العمل الاقانوني إلي يمارسوا الشباب و إلي هو أقرب ما يكون للآنرشيزم هو عمل شرعي بالنسبة ليا في بلد سياسينها ما عندهمش كلمة، يسرقوا مطالب الثورة و يخلقوا في لي فو ديبا نهار و ليل .  و ما تنظاف الحيوط كان ما تتنحى الرهوط. 

samedi 14 janvier 2012

14 جانفي، خرينة فيه ؟

تقريباً أكثر من عام بأيام ميلي قررت نحل هالبلوغ، و من نهرتها البلاد تهز ساق تغرق أختها، البلوغ عاطي شوية على عتبة أو دروج  ، بلوغ حلتو بش نحكي فيه على روحي بلغتي ، لقيت روحي نحكي على عباد اخرين، يسميهم العهد البائد بالظلاميين و الميليشيات، أنا جبتها برجلة و قلت بأعلى صوتي راني "ميليشي" ملخر، وقتها كانت الحرب على الحرية و نعرفو شكون عدونا...المهم مرحبا بيا مرة أخرى في البلغسبوت و شكراً "حل بلوغ". 


المقدمة الآنف ذكرها تتليفة لا غير..
الأكيد إلي برشة هبطوا لشارع الحبيب بورقيبة منكم إلي بش يحتفل ، منكم من هبط لساحة محمد علي خاطر مطالبو ما تحققتش ، منكم إلي هبط يكحل لا أكثر و لا أقل..إلخ. المهم أجواء حزبية إحتفالية تسودها روح الفرح و البهجة و العصافير تزقزق..أنا شخصياً هبط مطالباً بإستكمال الثورة التي وقفت كي سمعت الباجي قائد السبسي يصيح " تاقف غادي..تاقف غادي"، برشة ذكريات تمنيت نسترجعها اليوم أما مش مهم ، المهم كونو الأحزاب إلي جبنالها الحرية عبتنا ، قرتسنا و تبيع فينا اليوم في سوق قطر ، أمريكا وفرنسا (شكراً أيها الثالوث المرح). احزاب دخلتنا في مغالطات النقاب، الخلافة، الهوية، التطبيع...و نحنا كي العلالش تبعناها (لا استثني نفسي)، و نسينا مطالبنا "لعبوا بنا طرح شكبة عالمي". 

المهم أنا شخصيا اليوم نحتفل بذكرى ضياع الثورة المحنونة. 

فش نخرف ؟ تي رعية النهضة و التحرير هبطوا يعيطو "ربي مع الحكومة" ، "الشعب يريد تكريم الشهيد" و " تكبيييير" ، الحاصل برشة تبندير وتهليل وتكبير.. الشعب يريد تكريم الشهيد و حقوا وين ؟ الشهيد مات وحدو، ضربوا الضو؟ أين المحاسبة؟ أين هي فلسطين وقتلي تضع يدك في أكبر دولة مساهمة في تقتيل الشعب الفلسطيني مع إسرائيل ؟ التكبير ياخي يجي بطحين للقتلة و المجرمين ؟... حالة البهامة هذه في حالة إنتشار مع الأسف.  
احزاب الهانة كالمؤتمر و التكتل ، حدث ولا حرج ، احزاب باعت ناخبها مع أول منصب ، المرزوقي المناهض الأول لتعذيب و المنادي  بمحاسبة المجرمين بعثنا نيكو و إختار كرسي الرئاسة ، أما أخونا مصطفى بن جعفر الذي قال بصوت واضح قبل الإنتخابات أنه لن يتحالف مع النهضة أو غيرها كان أول من يلعق أحذية قيادات النهضة بعد فوزها.  هذا شوية من الدوسيات المسخة للأحزاب إلي تطلب في الوقت بش تبدى تخدم على روحها! ملة هذا شنوا ؟ 
 

الحاصل ما حصلنا شي (الدنيا غلات، الفساد الاداري حي لا يموت، البطالة كثروا، القناصة في ديارهم،) الهتسبوت تنحى و قعدنا فرايجية و ربي يخلينا الحكومة.


بالمختصر المفيد 14 جانفي خرينة فيه...